呢篇文章嘅正確標題係apm。但係維基技術唔畀文章題目用細楷英文字母開頭。
創紀之城五期入面嘅apm商場，係香港其中一個大型購物商場。佢位於觀塘道上面，隔離仲有觀塘站同埋裕民坊。佢嘅範圍除咗喺創紀之城五期之外，又包埋港貿中心大堂嗰一層。發展商係新鴻基地產，喺2005年7月17日正式開幕，並一早喺2004年12月試業。
apm所在嘅創紀之城第五期同埋創紀之城一、二、三期，仲有起緊嘅六期，同埋計劃緊嘅七期，合稱新鴻基嘅觀塘道王國。apm入面，有一座七層高嘅商場，裏面有餐廳、酒樓、衫鋪、化妝品鋪，同埋一間戲院。地庫仲有全港首間獨立經營嘅吉之島超級市場。apm樓下亦都有一個巴士總站同埋停車場，如果要搭過境巴士番去內地，都要去嗰度上車。
apm呢個名代表商場無論朝早（AM）定係下晝（PM）都歡迎顧客幫襯。而實際上，apm入面都有好多通宵開放嘅鋪頭。佢係區內最大嘅購物商場，延長嘅開放時間能夠切合當地人嘅需要，更不時有外國人同內地同志過嚟。普通鋪頭夜晚十二點收工，餐廳、酒樓就兩點收檔。有啲鋪頭就直程開通宵，年中無休。