新年，係唐人曆裏面嘅一年嘅開始，又叫做新春。因為響春天，所以北方多數春節。雖然1912年中華民國成立就轉用公曆，但係新年多數係講唐人曆法，而公曆多數叫元旦。新年唐人來講係好重要嘅節日。傳統來講，成個節係由正月初一到正月十五。而新年之前十二月唔同日子有唔同準備。廣東人會叫呢段日子做嘅嘢做過年。
唐人曆法因為要就埋月，又有閏月，一年長短唔定，所以同天文講嘅年，地球圍住太陽行咗啱啱一個圈唔同。不過，其實唐人都有呢種定義嘅年，就係做冬，即係冬節或冬至。所以廣東話就有句，做冬大過年。因為一年長短唔定，所以同公曆對照，年初一對公曆日子就年年唔同。

新年日子
通常十二月尾到正月初，呢段日子都會用年開頭，例如十二月廿八，就叫年廿八；十二月三十，就叫年三十；正月初一，就叫年初一；如此類推。
唔同日子就另有叫法，年初一之前嗰晚，即係年三十晚或年廿九晚，就叫除夕，或者大除夕；年十五，即係新年最尾嗰日，叫元宵，或者元宵節。