九廣輕鐵（簡稱輕鐵，以前叫輕便鐵路），係香港九廣鐵路公司營運嘅三條本地客運鐵路之一。喺新界西北嘅屯門區同元朗區之間行走，全長 36.15 公里。截至2004年，總共有 68 個車站，當中有 5 個車站同西鐵連接。輕鐵每日運作 19 個鐘，共有 13 條路線。車隊現時有 119 部輕鐵車輛，每部可以載 200 幾人。輕鐵營運嘅 12 條路線都有佢嘅代表顏色（另外有一條只係喺繁忙時間行駛嘅路線，即 751P，不過並冇喺路線圖度顯示出嚟），而整個輕鐵網絡以橙色代表。